H体育 新闻> 首页 > 名报 > 东方日报 > 正文 >

01月06日推介 祖记抢W打心理战

2015-01-06 11:01:36点击:来源: 网络转载 反馈
导读:笃爆普多斯基係无间道今晚意甲压轴好戏上演国家打吡,由榜首嘅祖云达斯主场火併国际米兰。度士都係睇意大利波长大,虽然意甲水准每况愈下,但由于祖记同国米一向势成水火,无论大家排名差距几大,当喺国家打吡碰头必...

笃爆普多斯基係无间道

今晚意甲压轴好戏上演国家打吡,由榜首嘅祖云达斯主场火併国际米兰。度士都係睇意大利波长大,虽然意甲水准每况愈下,但由于祖记同国米一向势成水火,无论大家排名差距几大,当喺国家打吡碰头必定打甩髀,初到贵境嘅国米新援普多斯基未出到力之馀,传媒仲大爆佢係「斑马兵团」粉丝,势必扰乱国米军心,祖记有望于新一年旗开得胜。

(TVB 301周三凌晨4时直播)

国米从阿仙奴借来德国前锋普多斯基,相信係意甲于冬季转会窗重开后最振奋嘅消息,话晒佢都係世盃冠军成员,但由于转会手续仲未搞掂,「王子」好大机会赶唔切对祖记上演处子骚。国米同祖记仇口甚深,以往对带有「斑马兵团」背景来投嘅人都非常敏感,无论係教头纳比、加斯柏连尼、达杜尼,抑或祖高域、佩雷斯等球员,有乜唔对办都被视为「无间道」嚟搅乱档。

离间计辣庆文仙尼

好事嘅意大利传媒即刻大起底,除咗话06年普多斯基代表拜仁于欧联作客国米攻入一粒外,07年受访嗰阵佢提到两位儿时偶像,係曾効力祖记嘅施丹同迪比亚路,仲话普多斯基一直係祖记粉丝。而国米能称霸意甲,全因「电话门事件」令祖记降班;大家唔好忘记,当时嘅国米教头,正係上年回巢嘅现任主帅文仙尼,係人都知文仙尼出名小器,普多斯基仲未为新东家出力,就因为篇陈年访问得罪「方丈」,自己冇运行不特止,祖记呢招「离间计」,势必扰乱国米军心。

况且祖云达斯今季喺「囧叔」阿里基执教下,胜在稳打稳扎,佢又同中场指挥官派路冰释前嫌,亦激活「野兽」泰维斯频频士哥,呢位阿根廷前锋以十个入波高踞射手榜榜首,弗到漏油,加上近六次主场迎战国米取得四胜一和一负,摆明食住「蓝黑兵团」,度士认为祖记稍胜一筹,有力于2015年首仗打响头炮。


TAGS:

相关阅读

热点话题

热点文章